VIJANA Mkoa wa Singida wanatarajia kunufaika na mikopo isiyokuwa na riba kutoka Ofisi ya Rais, Maendeleo ya vijana mara baada ya kufanya mafunzo ya ujasiriamali ikiwa lengo ni kupata maarifa sahihi namna ya kuanzisha na kuendeleza biashara zao na kuchochea maendeleo ya uchumi kwa ujumla.

Akizungumza na washiriki wa mafunzo hayo leo tarehe 03 Juni 2026 Ukumbi wa mikutano Manispaa ya Singida, Mkufunzi wa Restless Development, Bw. Simon Sirilo amesema mafunzo hayo maalumu ya ujasiriamali yamelenga kubadili mwelekeo wa kiuchumi mkoani Singida. Mafunzo ya siku tatu, yanayotarajiwa kuhitimishwa kesho kutwa, yamekuja kama mkombozi wa kipekee kwa vijana wenye kiu ya maendeleo, huku yakiratibiwa kwa ukaribu ili kuwajengea uwezo wa kusimamia biashara zao kwa weledi na tija zaidi katika soko la sasa la ushindani.

Msisimko mkubwa zaidi unatokana na fursa ya kipekee inayowasubiri washiriki mara baada ya kukamilisha mafunzo hayo. Serikali kupitia Ofisi ya Rais, Maendeleo ya Vijana imetangaza rasmi kuwa washiriki wote watakaokidhi vigezo watapatiwa mikopo isiyokuwa na riba yoyote, hatua inayolenga kuondoa kikwazo kikubwa cha mitaji kinachowakabili vijana wengi. Lengo kuu la mkakati huu madhubuti ni kuinua uchumi wa mkoa wa Singida kwa vitendo, huku ukichochea ukuaji wa biashara ndogo na za kati zinazoongozwa na nguvu kazi ya vijana.

Aidha baadhi ya washiriki wakiwakilishwa na Bw. Mohamed Hongoa amesema matumaini ni makubwa kwao na kuipongeza Serikali kwa kusikia kilio chao cha muda mrefu kuhusu masharti magumu na riba kubwa za mabenki. Wakizungumza kwa nyakati tofauti nje ya ukumbi huo, wamesema elimu waliyoipata leo pekee imewafumbua macho kwenye mambo mengi ya kiutendaji, ambayo yatafungua ukurasa mpya wa biashara zao na kuinua vipato vya familia zao.